نبدأ لكم فى هذا الموضوع شرح مفصل لبند المباني بشكل مفصل مع توضيح جميع فنيات بند المباني باسلوب بسيط ليتناسب مع الجميع باذن الله مع التوضيح بالصور اللازمة ، ونرجوا من الله ان ينفع بنا .
* هناك بعض المعلومات فى الاعمال المساحية لابد من معرفتها لضبط وفهم والتعامل مع بنود التشطيبات حيث يتم التعامل مع جميع بنود التشطيبات بناءا بعض المناسيب مثل منسوب الشيرب والذي نحدد من خلاله باقي المناسيب لجميع اعمال التشطيبات لذلك لازم اعرف ازاي احدد منسوب الشيرب وازاى اعرف انقله من مكان الى اخر ، وسيتم فرد موضوع خاص بشرح التعامل مع جهاز الميزان والقامة ولكن ما يلزمنا معرفته فى هذا الموضوع وهو خاص باول بند من بنود التشطيبات " بند المباني " هو كيفية تحديد ونقل منسوب الشيرب :-
معلومة ثابتة كده هى ان جميع اعمال التشطيبات يتم تنسيبها لمنسوب التشطيبات وليس الخرسانة يعنى مثلا اذا كانت لوحة المبانى قايل فيها ان منسوب فتحات الشبابيك على ارتفاع 1 متر فان المقصود ان ال 1 متر ده من منسوب التشطيب وليس من الخرسانة ولو كنا هناخده من الخرسانة يبقي هنزود ارتفاع التشطيب الى ممكن نفرضه 10 سم ( 7 سم رمل + 2 سم مونة + 1 سم ارضيات ).
1 – عشان احدد منسوب الشيرب بنروح لمكان متوسط الارتفاع لا هو منخفض ولا هو مرتفع عشان لما نشتغل بند الارضيات بعدين ميكونش فيه اماكن واخده رمل كتير او العكس ويفضل ان يكون بجوار عمود عشان اثبت على العمود ده منسوب الشيرب وبعدين نقوم محددين مقدار منسوب ارتفاع الشيرب الى هو هيكون 1 متر من التشطيب يبقي كده مفروض يكون على ارتفاع 1.10 متر من الخرسانة .
2 - بالمتر العادي بتاعنا هناخد 1.10 من وش الخرسانة واحنا موجودين جنب العمود ونحدد مثلث الشيرب وبيكون ضهر المثلث ده على ارتفاع 1.10 من الخرسانة و 1.00 من التشطيب .
3 – هنستخدم ميزان القامة عشان ننقل الشيرب عن طريق اننا بعد لما نضبط افقية الميزان بنروح نحط صفر القامة عند منسوب الشيرب يعني بداية القامة من تحت منطبقة مع ضهر المثلث بتاع الشيرب الموجود على العمود ونقوم واخدين قراية القامة كام ؟! مثلا كانت 70 سم ده معناه اني لو حطيت القامة فى اى مكان تاني وكانت قراية القامة 70 سم يبقي صفر القامة ده هو نفسه منسوب الشيرب وبالفعل انا هعمل كده هروح على اى مكان عايز انقل عليه الشيرب واثبت القامة بحيث الميزان يكون قرايته 70 سم واعلم وقتها على صفر القامة واحط علامة الشيرب بتاعي .
4 – ممكن نستخدم ميزان الخرطوم برده عشان ننقل منسوب الشيرب وده ان الخرطوم يكون ممتلئ بالمياه وخالى تماما من اي فراغات ونقوم واققين جنب الشيرب بطرف من الخرطوم والطرف الاخر عند المكان المطلوب نقل الشيرب ليه وبعدين بنعلى ونوطي بالطرف البعيد عن منسوب الشيرب الاصلي لحد لما نلاقي منسوب المياه فى الخرطوم عند طرف الشيرب الاصلي في نفس منسوب الشيرب الاصلي فى وقتها علطول يبقي نحدد علامة الشريب و بكده يكون نقلنا نفس منسوب الشيرب ده .
الفصل الاول :- توقيت بند المباني
توقيت البند هو فى الاساس اول بند من بنود التشطيبات بعد مرحلة العظم لكن فى حال كان التعامل مع عمارة او برج او اكثر من مقاولة فلابد من مراعاة جانب الادارة فى التنفيذ لذلك مش الافضل اني لما اخلص كل دور او شقة خرسانات ادخل اشتغل فيها مباني لان معدل انهاء المباني اسرع من الخرسانات وبالتالي البنا الي معايا هيعطل وهيروح يشتغل فى مكان تاني لما يخلص عندي وكمية شغله اصبحت محدودة عندي وبكده معرفش اخد منه سعر مصنعية منخفض لذلك مش ده الافضل وبرده مش الافضل اني اخلص شغل الخرسانات بالكامل لكل الادوار الى في العمارة وبعدين ادخل فى بند المباني لان ده هيأخر معايا المشروع فى الاخر لان بند المباني لو خلص بدري بيفتح معايا شغل لباقي بنود التشطيبات زي تاسيس الكهربا والسباكة و النجارة والمحارة وهكذا لذلك النظام ده برده مش الافضل وبالتالي يكون افضل نظام اننا نراعي فرق معدل انتاجية الخرسانات ومعدل انتاجية المباني ونخلي الفرق ده هو المتحكم امته ابدأ في بند المباني عشان من ناحية لما البنا يدخل عندي يشتغل وميعطلش واعرف اخد منه سعر مصنعية كويس وبرده هينجز بدري ويفتح وراه باقي بنود التشطيبات واقدر اضغط المشروع باقل تكلفة ولانهاء هذا المعلومة نقدر نقول ان معدل الانتاجية هو المفتاح بتاعك لاتخاذ قرار فتح الشغل من تاجيله وللعلم فالشائع في هذا الامر هو اني ابدأ بند المباني لما اخلص من خرسانات الدور الرابع يعني يكون النجار المسلح بيبدأ فى الدور الخامس والبنا داخل يفتح شغله تحت .
الفصل الثاني:- تقدير مون بند المباني
1- الطوب :- عشان اعرف انا محتاج كام طوبة لازم احدد الاول فين الحوائط الطوبة وفين الحوائط نصف الطوبة عشان اقدر احسب الاجمالى + معرفة ابعاد الطوبة الى هستخدمها معايا لان دلوقتي الابعاد القياسية للطوبة ( 25 * 12 * 6 ) مش موجودة وكل مصنع بيطلع طوبة شكل و يمكن الاعتماد على الابعاد الشائعو حاليا ( 20 * 10 * 6 ) ولكن الافضل تشوف عينة من المصنع الى هتتعامل معاه وتعرف ابعادها بالظبط وبالتالي تعرف المتر المربع فيه كام طوبة للحوائط سمك نصف طوبة وبرده نعرف المتر المكعب فيه كام طوبة عشان اقدر احسب للحوائط الطوبة بسرعة وبناءا على مساحة الحوائط الاجمالية فى حالة النصف طوبة وحجم الحوائط الاجمالية للحوائط الطوبة نقدر نعرف عدد الطوب اللازم .
ملحوظة 1 :- الحوائط سمك نصف طوبة مش متينة ولا عازلة زي الحوائط سمك الطوبة لذلك بنستخدم النصف طوبة فى الحوائط الداخلية بين الغرف " قواطع داخلية " اما الحوائط الخارجية الافضل يكون طوبة الا فى اضيق الحدود لو الموضوع هيأثر على مساحات الغرف وبخاصة فى الامساحات الضيقة وبرده حوائط الحمامات والمطابخ تكون طوبة عشان بنكسر فيها كتير .
- الحائط سمك نصف طوبة يتم حصره بالمتر المسطح فى اعمال الحصر ولو عندي حائط نصف طوبة وعايز اعرف عدد الطوب الى فيه بنقسم مساحة الحائط على مساحة وجه الطوبة مثلا حائط مساحته 12 متر مسطح نقسمه على ( 0.21 * 0.07 ) وهي مساحة وجه الطوبة بعد اضافة سمك 1سم للعرموس يدينا يدينا حوالى 816 طوبة .
- الحوائط سمك الطوبة يتم حصرها بالمتر المكعب يعني بناخد فى الاعتبار سمك الحائط ولو عندي حائط سمك طوبة وعايز احصره بنقسم حجم الحائط على حجم الطوبة مثلا نفس الحائط السابق هيكون حجمه ( المساحة * السمك ) يعني 12 * 0.20 وعندنا حجم الطوبة هيكون ( 0.21 * 0.07 * 0.11 ) وزودنا هنا برده سمك العرموس نقسم والناتج هيكون 1485 .
ملحوظة 2 :- ضروري اكيد عند طلب كمية الطوب لازم نضيف عليها قيمة الهالك الي بنفرضه احنا تبعا للخبرة والمنطق فليس من المعقول ان تكون نسبة الهالك مثلا كما هو شائع 5 % فقد تعطي ارقاما بالآلاف مبالغا فيها لانها ليست بالنسبة القليلة لذلك نقوم نحن بتقدير كمية مناسبة من الهالك يتم اضافهتا لطلبية الطوب مع مراعاة جودة الطوبة واتخاذ اجراءات النقل والتشوين المناسبة حتى لا نزيد من كمية الهالك ولو ناوي تحسب حسبة سريعة كده ممكن تجمع اطوال الحوائط النصف طوبة واطوال الحوائط الطوبة وتجيب المساحات والاحجام وتحسب العدد علطول بدون تخصيم فتحات الابواب والشبابيك والناتج هيكون هو النهائي بدون اضافة نسبة هالك وذلك باعتبار ان تخصيم الفتحات هيكون هو مقابل الهالك .
2- عشان نحسب ونقدر كميات الرمل والاسمنت نروح نراجع مرة واتنين على حصر كمية الطوب لان بناءا عليها هنحدد كميات الرمل والاسمنت كالتالي ( 1000 طوبة هتحتاج 0.5 متر مكعب رمل + 3 شيكاير اسمنت " الطن فيه 20 شيكارة " + من 40 % الى 50 % من وزن الاسمنت مياة للخلط ) والمعادلة دي لازم وضروري نحفظها لحفظ ماء الوجه امام الصنايعية وابناء المهنة والناس .
- لما تنوى وتروح تتفق مع صنايعي لازم تتفق معاه على المواصفة وفنيات الشغل الي مطلوب منه والى لو خالف ده واشتغل غير كده مش هيكون ليه حساب وبرده بنتفق معاه على ازاى هنحاسبه هل لكل متر مسطح او مكعب على حسب حالة الحائط نصف طوبة ولا طوبة ولا هنتحاسب بالالف طوبة وده الاكثر انتشارا يعني نتفق الالف طوبة مصنعية بكام ونشوف فى الاخر هو عمل كام الف طوبة فعلى وصافى ونحاسب عليهم وشكرا .
- معلومة بسيطة كده ممكن تقدر ان كل صنايعي بنا ممكن يبني فى اليوم الواحد بمعدل ( 1500 – 2000 ) طوبة .
- ملحوظة 3 :- مهم جدا جدا نراعي اعمال النقل والتشوين للمون عشان نريح العمال سواءا عمال الونش او صنايعية المباني لذلك لازم تعرف الونش هيتنصب فى اي مكان عشان بناءا عليه هتنزل المون ( الطوب و الرمل والاسمنت ) بحث الحلة بتاع الونش تنزل من فوق على الرمل وتتملى بسرعة وتطلع تاني وده هيريح الناس وينجز العمل وبرده التشوين فوق لازم يكون متوزع على السقف مش فى مكان واحد فيكون حمل كبير على السقف او انه يتحط فى مكان يعوق حركة البنا لذلك هنوزع الطوب بجوار كل حائط على بعد 1 متر من الحائط و الرمل والاسمنت نوزعهم على اماكن بعيدة عن الحوائط ومتفرقة عشان ميكونش حمل كبير على الصبة .
الفصل الثالث :- مصطلحات فى البناء
• الشناوي :- الجهة الطويلة من الحائط (25 سم * 6 سم)
• المدماك :- تطلق على أي صف أفقي من الطوب .
• مدماك الأد :- هو أول مدماك من أسفل الحائط .
• اللحامات :- هي المونة بين الطوب .
• المرقد :- هو اللحام الأفقي .
• العرموس :- هو اللحام الرأسي .
• الترويسة :- أول وآخر طوبة في المدماك .
• الكنيزر :- هو ربع طوبة يوضع في بداية المدماك في الحوائط سمك 25 سم لقطع الحل .
• مسافة الطية :- المسافة الأفقية المحصورة بين عرموسين رأسيين في مدماكين متتالين .
• وش الحائط :- الجهة التي يقف بها الصنايعي أثناء بناء الحائط و يكون الحائط أكثر استواءاً من هذه الجهة .
• ظهر الحائط :- الجهة المعاكسة للجهة التي يقف بها الصنايعي أثناء بناء الحائط و تكون جودتها أقل من وش الحائط .
• قلب اليد :- تطلق على حوائط الواجهات عندما يكون الصنايعي واقفاً داخل المبنى و يريد جعل وش الحائط من جهة الخارج فيسمى (شغل قلب يد) .
• التزهير :- هو ظهور أملاح على الحائط بسبب عدم رش الطوب و المباني بالمياة .
• الخيط طاعن :- عندما يكون الخيط المشدود ملامس لطوبة من الطوب .
• القاطوع :- الحوائط الصغيرة التي تستخدم للفصل بين الفراغات .
• السلاح :- هي أجزاء صغيرة من المباني تكون متعامدة على الحوائط لغرض معماري معين مثل تركيب القرميد على الأسطح .
• الساعي :- هو خيط يقوم البنا بشده على بدايات و نهايات الحوائط و الفتحات لضبط رأسيتها و يجب أن يكون خيط الساعي موزون تماماً .
• المفاتيح :- تطلق على طوب الربط بين الحوائط المتعامدة .
• الشنايش:- فتحات يتم تركها في الحائط لمرور السقالات أو المواسير أو أي أعمال .
• تملية الحائط:- أي ملئ الفراغات بين الطوب جيداً بالمونة من الجهتين .
• تكحيل العراميس:- هو إزالة المونة البارزة من اللحامات بين الطوب باستخدام قطعة من الخشب أو خرطوم كهرباء و يجب تكحيل العراميس قبل جفاف المونه .
• حل الرباط:- عندما يكون أكثر من عرموس رأسي لمداميك متتالية متصلة مما يسبب شروخ في الحائط .
• الجلسة:- هي المباني أسفل الشباك .
• الدروة:- هي سور السطح أو البلكونة .
• الطبانة:- هي الجزء العلوي من الدروة .
• السوكة:- هي حافة أي حائط عند الزاوية القائمة .
الفصل الرابع :- فنيات بند المباني
لما نيجي نتكلم عن الفنيات فى تنفيذ بند المباني فلازم تاخد بالك ان ده هو عبارة عن استلام بند المباني يعني الى المفروض يتنفذ فنيا هو نفسه الى انت مفروض تشيك هو اتنفذ بالفعل ولا لا و تستلمه .
- لابد من التأكد من تمام وضب طريقة الترابط بين الطوب وبعضة يعنى ملاقيش عرموسين فوق بعض لان مكان العرموس ده يعتبر مكان ضعيف ولو لم يتم ضبط طريقة الترابط بين الطوب هيظهر معاك تنميلات فى المحارة وممكن يظهر شروخ كمان .
- فى حالة الحوائط سمك طوبة فيكون الترابط فيتم الربط بين الطوب فى كل مدماك كما تم توضيحه سابقا بالاضافة الى الربط عن طريق مدماك ادية اى يتم عمل مدماك شناوي والي فوقه يكون منماك ادية ومن الممكن ان يكون مدماك الادية كل 2 مدماك شناوي او كل 3 شناوي حسب المنصوص فى المواصفة ولاكن لا يزيد عن ذلك .
- يتم عمل طرف رباط لكل جدارين متصلين اي اثناء عملية بناء الجدار اذا كان هناك جدار اخر عمودي عليه فيتم عمل طرف ربناط عند مكان الاتصال بين الجدارين ويتم ذلك بوضع طوبة فى الاتجاه العمودي بحيث يكون نصف هذه الطوبة فى الجدار الجاري بناءه والنصف الاخر سيتم الاعتماد عليه فى بناء الجدار العمودي نفس فكرة اشاير الاعمدة ويتم عمل طرف الرباط فى مدماك وترك الذي يليه ثم يتم مد طرف الرباط فيكون مدماك فيه طرف رباط ومدماك لا يوجد به طرف رباط وتكمن اهمية ذلك الرباط فى تجنب حدوث شرخ فى منطقة الاتصال بين الجدارين مستقبلا .
- احيانا فى حالات التعديلات المعمارية فى الحوائط او غيره من الاسباب نحتاج الى عمل حائط فى اماكن لم يتم مد طرف رباط فيها لذلك يكون الحل يتم عمل ما يسمي بفتح مفاتيح اي يتم تكسير مقدار نصف طوبة فى الحائط القائم عند مكان الاتصال ويكون الفتح فى مدماك ثم ترك الذي يليه ثم فتح ثم ترك وهكذا حتي نحصل بالنهاية على امكانية مد طرف رباط قوي بين الحائطين ولا يتم تجاهل عمل ذلك لنتفادي ظهور الشروخ بين الحائطين .
- كما تم مراعاه الربط بين حوائط الطوب وبعضها لتفادي ظهور التنميلات والشروخ يتم ايضا مراعاه الربط بين الحوائط والاعمدة حيث يتم الربط بين الحوائط والاعمدة وهناك فى ذلك 3 طرق
- الطريقة الاولى :- قبل صب الاعمدة وبعد انتهاء الشدة الخشبية واعمال الحدادة للاعمدة نحضر قطع اسياخ حديد فى حدود 50 سم ويتم تثبيت نصفها داخل الشدة الخشبية والنصف الاخر يكون خارج الشدة ويتم تثبيتها فى الاوجه التي سيتم بناء جدار بجواره ويتم تكرار ذلك السيخ كل ارتفاع 50 سم من ارتفاع الجدار حيث بعد انتهاء صب الاعمدة وعند بناء الجدار سيتم تبييت الجزء الباقي من السيخ داخل الجدار بين اقرب مدماكين .
هذه الطريقة ليست الافضل لانها تتطلب تكسير فى الواح الشدة الخشبية كما ان السيخ الذي تم وضعه داخل العمود هو معرض للصدأ والذي يمكن ان ينتقل الصدأ لحديد الاعمدة من هذا الباب .
- الطريقة الثانية :- استخدام كانات للربط بين العمود والحائط حيث تثبت تلك الكانات اثناء البناء ويتم تثبيها في العمود عند اماكن الاتصال بين العمود والحائط كل 50 سم ارتفاع وتمتد داخل الحائط بين مدماكين .
- الطريقة الثالثة :- هي نفس الطريقة الاولى ولكن يتم الاعتماد على تزريع قطع اسياخ الحديد اثناء بناء الحوائط وليس عند طب الاعمدة .
- هنا ملحوظة تخص تربيط الاعمدة مع الجدران وهي قد نتجاهل تنفيذ وسائل الربط بين العمود والحائط فى المباني السكنية " الشغل البلدي " ولن يحدث هنا اى ضرر ولكن فى بعض الاحيان يكون من الضروري تحقيق الترابط بين الحاوائط والاعمدة كما فى المصانع مثلا لانها معرضه لاهتزازات ناتجة عن تشغيل الالات او في الاماكن القريبة من سكك القطارات والمعرضة ايضا للاهتزازات وايضا فى اماكن الكوابيل فى المباني السكنية وغيرها حيث يحدث هناك ترخيم للكابولي ويهبط معه الجدار ويؤدي ذلك الى ظهور فاصل وشرخ بين الاعمدة والحوائط .
- مبدئيا كده مينفعش نطلع بجدار مباني مرة واحدة بكامل الارتفاع يعني مثلا لو ارتفاع الجدار 3 متر مينفعش البنا يقوم يبني كل الارتفاع ده مرة واحدة وانما الصح انه بيبني على حطات والمقصود بالحطة هنا هو انه يبني ارتفاع معين من الجدار ويكمل تاني يوم وارتفاع الحطة طبقا للمواصفة المصرية هو 1.2 متر ولكن من الممكن ان يصل نتجاوز عن هذا الارتفاع الى 1.5 متر يعني نبني الجدار ال 3 متر على حطتين وليس 3 حطات لكن مينفعش اطلع مره واحده لان الحيطة هتكون ضعيفة ووارد جدا انها تلعب منه فى الوزنة بتاعها .
- التشحيط ومعني التشحيط هو اني لما اخلص بناء الحائط الى اعلى اكيد هيكون فيه فاصل بين السقف او الكمرة قبل لما نقفل هذا الفاصل بالمونة مع كسر الطوب لازم اضغط الجدار لاسفل عن طريق وضع ما يسمي بـ ( خوابير او اسفين ) وهي عبارة عم قطعة خشب بسمك مناسب يتم دقها في الفراغ العلوي بين الحائط والسقف او الكمرة بحيث تضغط الحائط لاسفل وتزيد من متانة هذا الحائط وخاصة عن التكسير فيه لاعمال الكهرباء والتجارة والسباكة وغيرها وتم تثبيت هذه الخوابير بطريقة موازية للحائط وتقسيط الحائط على 3 خوابير بطول الحائط واذا تم تثبيت الخوابير بشكل عمودي على الحائط وكانت ظاهرة بيتم ازالتها عند البدء باعمال المحارة اى بعد انتهاء التكسير في الحوائط لزوم تاسيس الكهرباء او غيرها من البنود .
وللعلم هناك بعض الاستشاريين لديهم طريقة اخري وهي ان يتم بناء كامل الجدار ولكن يتم تقسيط اخر 7 مداميك بحث يترك مسافة تقدر ب 1 سم تقريبا فى الاعلى بين الجدار والسقف ويتم ملئ هذه المسافة " 1سم " بمادة مونة الجراوت الغير قابلة للانكماش ولكن الاشهر فى الاستخدام هى طريقة الخوابير .
- عند الحديث عن العتب فيمكن تعريفه ان عبارة عن كمرة صغيرة يتم وضعها اعلى الفتاحات ( الابواب والشبابيك ) لتيم تحميل وتوزيع باقي احمال المبانى عليها .
وتعريف العتبة ككمرة يستدعى ان يتم مراعاة ابعاد العتبة " طول – عرض – سمك " لتقوم بوظائفها في نقل الاحمال دون ظهور اى عيوب ، وكثيرا ما نري شروخ على زاوية 45 درجة فى اركان الفتحات والتي يكون سببها هو تركيز الاجهادات في هذه المنطقة نتيجة عدم قيام العتب بوظائفه .
اولا : طول العتبية لابد ان يكون مساويا لطول الفتحة بالاضافي الى مسافة رفرفة قدرها 20 سم في كلا من الاتجاهين يعني لو فتحة الباب طولها 1 متر يبقي طول العتبة لا يقل عن 140 سم عشان نحقق اقل مسافة رفرفة .
ثانيا : عرض العتبة وهو هيكون بنفس سمك الحائط ايا كان سمك الحائط نصف طوبة او طوبة فيكون عرض العتبة مساويا لسمك الحائط .
ثالثا : سمك العتبة " ارتفاع العتبة " ويعتبر من الاشياء الهامة وخاصة في الفتحات الكبيرة والتى قد يسبب اهمالها حدوث ترخيم في العتبة مما يعيق من استخدام الشبابيك و الابواب عند الفتح والقفل وبخاصة اذا كانت من الالوميتال ، ويمكن تحديد سمك العتب بنفس طريقة فرض سمك الكمرات البسيطة وهي طول البحر مقسوم على 10 فاذا كان طول الفتحة 2 متر يكون سمك العتبة 20 سم وهكذا .
اما الحديد والخرسانة فلابد من الاهتمام بجودة كليهما حيث يتم استخدام سيخين حديد على الاقل قطر مناسب اقل شئ قطر 10 ويكون خالى من الصدأ مع العلم ان هناك بعض المواصفات داخل المقايسات تلزمك بان يكون الحديد مثل الكمرة يعني تسليح علوي وسفلى وكانات ايضا اما الخرسانة فتكون ايضا ذات جودة مقبولة بعيدة عن عيوب قلة الاسمنت وزيادة نسبة المياة وانما تكون جيده ومن الافضل ان يتم عمل وتنفيذ العتب بالموقع ونبتعد عن العتب الجاهز ضعيف الجودة .
- ملحوظة :- احيانا اذا كان طول الفتحة كبير مثلا 2 متر فان فى هذه الحالة سيكون طول العتبة 2.4 متر وسمكها 20 سم وبالتالي هتكون كبيرة وثقيلة لذلك بنصبها في مكانها اعلى الفتحة" يتم صبها على ابوه " يعني بنعمها شدة خشبية زي الكمرة عادى ، واحيانا ايضا فى بعض الحالات قد لا نحتاج الى عتب فوق الفتحات مثلا فى حالة الفتحات شكل ارش فاننا لا نحتاج الى عتب وايضا في الفتحات ذات الارتفاع الكبير حيث تصل الفتحة الى بطنية السقف او بطنية سقوط الكمرات .
ما هى المحاكية او اللمعة :- هى الطوبة او نصف الطوبة الموجود بجانب فتحة الباب والذي يتم اسناد العتب عليه كما يتم التكسير فيه لتثبيت حلوق ابواب النجارة بواسطة كانات التثبيت بالاضافة الي تثبيت البرواز " السجاف - البرور " الخاص بالفتحة " شباك او باب "
طيب ما الفرق بين المحاكية والكتف ؟
المحاكية زي ما قولنا لكن الكتف هو الجزء الباقي من الحائط والموجود بجانب فتحة الباب " الجزء الكبير "
ملحوظة :- فى الظروف الاضطرارية والتي نضطر فيها لالغاء المحاكية سيتم التصرف الآتي
اولا العتب :- يتم تزريع اسياخ حديد العب داخل العمود ويتم الصب على ابوه
ثانيا تثبيت النجارة :- يتم ترك مسافة (1-2) سم ويتم تثبيت الحلوق بواسطة الفوم حيث يتم ضخ الفوم فى الفاصل ( 1-2 ) سم بين الحلق والعمود ويتم التثبيت .
ثالثا البرواز :- يتم تركيب البرواز بالكامل ولكن فى المنطقة بين الحلق والعمود يتم استخدام برواز ربع عمود .
للانتقال الى الجزء الثاني من شرح جميع فنيات تنفيذ واستلام بند المباني :-
- شرح جميع فنيات تنفيذ بند المباني الجزء الثاني
